រដ្ឋបាលសង្កាត់ទន្លេបាសាក់ ខណ្ឌចម្ការមន រាជធានីភ្នំពេញ កំពុងបន្តអនុវត្តគម្រោងអភិវឌ្ឍន៍ហេដ្ឋារចនាសម្ព័ន្ធមូលដ្ឋាន សម្រាប់ឆ្នាំ២០២៦ ដោយផ្តោតសំខាន់លើការកែលម្អប្រព័ន្ធលូរំដោះទឹក ដើម្បីបង្កើនប្រសិទ្ធភាពក្នុងការរំដោះទឹកភ្លៀង និងកាត់បន្ថយការលិចលង់នៅតំបន់មួយចំនួនក្នុងមូលដ្ឋាន។

នគរបាលរាជធានីភ្នំពេញ នារសៀលថ្ងៃទី២៨ ខែកញ្ញា ប្រាប់ឲ្យដឹងថា ដោយ​អនុវត្ត​តាម​បទ​បញ្ជា​របស់លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការ​នគរបាល​រាជ​ធានី​ភ្នំពេញ ​កាលពីថ្ងៃទី២៦ ខែកញ្ញា ឆ្នាំ២០២៦ វេលាម៉ោង២២ និង ៣០នាទី កម្លាំង​ការិយាល័យ​នគរបាល​ព្រហ្មទណ្ឌកម្រិតស្រាល រាជធានីភ្នំពេញ ដឹកនាំដោយលោកឧត្តម​សេនីយ៍​ត្រី ​ប៊ុន សត្យា ស្នងការរង ទទួលផែនការងារនគរបាលព្រហ្មទណ្ឌ និងដឹកនាំ​កម្លាំង​អនុវត្ត​ផ្ទាល់​ពី​លោក​វរសេនីយ៍ឯក ម៉ម សាវន នាយការិយាល័យនគរបាលព្រហ្មទណ្ឌកម្រិតស្រាល ធ្វើការ​ស្រាវ​ជ្រាវ​ឃាត់​ខ្លួន​ជនសង្ស័យ ០៩នាក់ ពាក់ព័ន្ធករណីវាយប្លន់យកម៉ូតូ ។

គិតត្រឹមថ្ងៃទី២២ ខែកញ្ញា ឆ្នាំ២០២៦នេះ រដ្ឋបាលរាជធានីភ្នំពេញ ដោយមានមន្ទីរសាធារណការ និងដឹកជញ្ជូនរាជធានីភ្នំពេញជាសេនាធិការ បានសម្រេចជោគជ័យលើការងារដាក់ប្រព័ន្ធលូមូលអង្កត់ផ្ចិត ១ម៉ែត្រ ព្រមទាំងការបំពេញបន្ថែម និងពង្រីកផ្លូវលើកំណាត់មហាវិថី សម្តេចអគ្គមហាសេនាបតីតេជោ ហ៊ុន សែន (ផ្លូវ ៦០ម៉ែត្រ) ស្ថិតក្នុងសង្កាត់ចាក់អង្រែក្រោម ខណ្ឌមានជ័យ។

ចាប់ពីថ្ងៃទី១៤ ដល់ថ្ងៃទី២០ ខែកញ្ញាឆ្នាំ២០២៦នេះ ក្រុមការងារមន្ទីរសាធារណការ និងដឹកជញ្ជូនរាជធានីរាជធានីភ្នំពេញ សហការជាមួយរដ្ឋបាលខណ្ឌពោធិ៍សែនជ័យ និងរដ្ឋបាលខណ្ឌសែនសុខ ធ្វើការបូមស្តារលូ កាត់កៅស៊ូបើកមុខអណ្តូងលូអោយធំ ដកចម្រឹុងសំរាម និងកាយប្រឡាយស្របផ្លូវរថភ្លើង និងប្រឡាយទួលសំពៅ ។

ដើម្បីចូលរួមលើកកម្ពស់សណ្តាប់ធ្នាប់ អនាម័យ និងបរិស្ថាននៅតាមដងផ្លូវសាធារណៈ នាព្រឹកថ្ងៃទី២១ ខែកញ្ញា ឆ្នាំ២០២៦ លោក ឃឹម ស៊ុនសូដា អភិបាល នៃគណៈអភិបាលខណ្ឌកំបូល បានដឹកនាំមន្ត្រីរាជការរដ្ឋបាលខណ្ឌ រដ្ឋបាលសង្កាត់កំបូល និងសង្កាត់កន្ទោក សហការជាមួយតំណាងរោងចក្រ ថបសាមីត ចុះផ្សព្វផ្សាយ និងណែនាំដល់ អាជីវករ ព្រមទាំងកម្មករ-កម្មការិនី ដែលប្រកបរបរលក់ដូរនៅមុខរោងចក្រ ឱ្យចូលរួមរៀបចំសណ្តាប់ធ្នាប់ និងថែរក្សាអនាម័យបរិស្ថាន។

គិតត្រឹមថ្ងៃទី១៨ ខែកញ្ញា ឆ្នាំ២០២៦នេះ រដ្ឋបាលរាជធានីភ្នំពេញ ដោយមានមន្ទីរសាធារណការ និងដឹកជញ្ជូនរាជធានីភ្នំពេញ ជាសេនាធិការ បាននិងកំពុងអនុវត្តគម្រោងបើកផ្លូវថ្មីមួយខ្សែ ស្ថិតក្នុងសង្កាត់ស្រះចក ខណ្ឌដូនពេញ ដោយសម្រេចវឌ្ឍនភាពការងារបានប្រមាណ ៧៥% ហើយ។