លោក ណារ៉ា ចំរើន អភិបាលស្រុកកណ្ដៀង និងជាប្រធានកិត្តិយសអនុសាខាកាកបាទក្រហមកម្ពុជាស្រុកកណ្ដៀង សហការជាមួយរដ្ឋបាលឃុំស្រែស្ដុក បាននាំយកអំណោយមនុស្សធម៌ប្រគល់ជូនគ្រួសារខ្វះខាត ១គ្រួសារ នៅភូមិធ្លាអំពិល ឃុំស្រែស្ដុក ស្រុកកណ្ដៀង ខេត្តពោធិ៍សាត់។ អំណោយទាំងនោះរួមមាន អង្ករ ២៥គីឡូក្រាម មី ១កេស ទឹកត្រី ទឹកស៊ីអ៊ីវ ទឹកសុទ្ធ និងត្រីខ យ៉ាងណាមួយយួរៗ ដើម្បីជួយសម្រាលជីវភាពប្រចាំថ្ងៃ ស្របតាមគោលការណ៍មនុស្សធម៌របស់កាកបាទក្រហមកម្ពុជា។

លោក ធាម សុផាត អភិបាលស្រុកភ្នំក្រវាញ បានអញ្ជើញចូលរួមកិច្ចប្រជុំពិនិត្យ និងវាយតម្លៃវឌ្ឍភាពការអនុវត្តគម្រោងដាំបង្គោលសូឡា នៅសាលាឃុំលាច ស្រុកភ្នំក្រវាញ​​​ ខេត្តពោធិ៍សាត់។ កិច្ចប្រជុំនេះផ្តោតលើការតាមដានលទ្ធផលការងារ និងកំណត់ទិសដៅអនុវត្តបន្ត ដើម្បីធានាឱ្យគម្រោងសម្រេចបានតាមផែនការ មានគុណភាព និងរួមចំណែកលើកកម្ពស់សុវត្ថិភាពជូនប្រជាពលរដ្ឋក្នុងមូលដ្ឋាន។

លោក អ៊ន សុផល្លា អភិបាលស្រុកក្រគរ ខេត្តពោធិ៍សាត់ រួមជាមួយក្រុមការងារ បានចុះពិនិត្យគម្រោងហេដ្ឋារចនាសម្ព័ន្ធចំនួន ៣ កាលពីព្រឹកថ្ងៃទី១០ ខែវិច្ឆិកា ឆ្នាំ២០២៦ រួមមាន៖ ផ្លូវក្រួសក្រហមនៅឃុំឈើតុំរួចរាល់ ១០០% ផ្លូវកៅស៊ូនៅឃុំស្វាយសសម្រេចបាន ៧០% និងស្ពានចំនួន ៣ កន្លែងនៅឃុំស្វាយសសម្រេចបាន ៦៥% ដើម្បីធានាគុណភាព និងការប្រើប្រាស់បានយូរអង្វែង។

រាជរដ្ឋាភិបាលកម្ពុជា បាននាំយកស្បៀងអាហារចែកជូនប្រជាពលរដ្ឋរងគ្រោះដោយទឹកជំនន់ចំនួន ១.០០៥គ្រួសារ មកពីឃុំឈើតុំ និងឃុំស្វាយស នាព្រឹកថ្ងៃទី១០ ខែវិច្ឆិកា ឆ្នាំ២០២៦ នៅវត្តទួលត្បែង ស្រុកក្រគរ ដើម្បីជួយសម្រាលទុក្ខលំបាក និងតម្រូវការចាំបាច់របស់ប្រជាពលរដ្ឋបានទាន់ពេលវេលា។

លោក ផាយ ឡេង អភិបាលក្រុងពោធិ៍សាត់ បានដឹកនាំអាជ្ញាធរ និងប្រជាពលរដ្ឋ ចុះសម្អាតបរិស្ថាន និងរៀបចំសណ្តាប់ធ្នាប់សាធារណៈតាមដងផ្លូវឆ្ពោះទៅវត្តលលកសថ្មី ក្នុងសង្កាត់លលកស សកម្មភាពនេះធ្វើឡើងដើម្បីលើកកម្ពស់សោភ័ណភាពក្រុង និងជំរុញឱ្យប្រជាពលរដ្ឋចូលរួមថែរក្សាអនាម័យជាប្រចាំ។

លោក ផាយ ឡេង អភិបាលក្រុងពោធិ៍សាត់ បានអញ្ជើញជាអធិបតីក្នុងពិធីសម្ពោធអគារសិក្សា ១ខ្នង (៣បន្ទប់) និងបង្គន់អនាម័យ ១ខ្នង (៥បន្ទប់) នៅវិទ្យាល័យទាចំរ៉ាត់។ សមិទ្ធផលទាំងនេះជាជំនួយពីសប្បុរសជនជប៉ុន (ក្រុមហ៊ុន នីស៊ីកាវ៉ា កីសូគុ និងអង្គការ EDF) ដើម្បីលើកកម្ពស់គុណភាពអប់រំ អនាម័យសិស្ស និងពង្រឹងមិត្តភាពកម្ពុជា-ជប៉ុន។